აპგეიმინგის პირველი ინტელექტუალური ჩემპიონატი „რა? სად? როდის?“

არაფერი ისე არ აერთიანებს გუნდს, როგორც მეგობრული შეჯიბრი. ცოტა ხნის წინ, ჩვენი საკუთარი „რა? სად? როდის?“ ჩავატარეთ და სიმართლე გითხრათ, იმაზე ბევრად აზარტული გამოდგა, ვიდრე ველოდით.

როგორ ვემზადებოდით

სანახევროდ არაფერს ვაკეთებთ - თუ თამაშია, ბოლომდე თამაში იყოს. სულ 10 გუნდი შეიკრიბა, თითოეულში 6 მოთამაშე, ზუსტად ისე, როგორც კლასიკურ ფორმატშია მიღებული. თამაშის წაყვანა კი თავად ლეგენდარულ „ბატონ წამყვანს“ ვთხოვეთ.

იმ ცნობილი ხმის გაგონებამ დარბაზში მაშინვე სხვა მუხტი შემოიტანა. ყველას გვინდოდა, რომ სწორი პასუხის შემდეგ ის ნანატრი შექება დაგვემსახურებინა.

ერთი წუთი ფიქრისთვის

წარმოიდგინეთ დარბაზი, სადაც 60 ადამიანი ერთდროულად ცდილობს რაღაც მივიწყებული ისტორიული ფაქტის გახსენებას ან ლოგიკური თავსატეხის ამოხსნას. იყო ყველაფერი: ცხარე კამათი, ბოლო წამზე გაცემული სწორი პასუხები და ის საოცარი სიჩუმე, რომელიც პასუხის მოლოდინში ისადგურებს ხოლმე.

კიდევ ერთხელ დავრწმუნდით, რომ ჩვენს გუნდს რთული ამოცანების ამოხსნა არამხოლოდ მუშაობისას, არამედ თამაშის დროსაც კარგად გამოსდის. სწორედ ასეთი საერთო გამოცდილებები აყალიბებს აპგეიმინგის ლაინაფის კულტურას და კიდევ უფრო აერთიანებს ჩვენს გუნდს.

გამარჯვებულები და საჩუქრები

სიმბოლური საჩუქრები ყველამ მიიღო, თუმცა გამარჯვებულ გუნდს განსაკუთრებული პრიზები ერგო, იმ სტატუსთან ერთად, რომელიც მომდევნო ტურნირამდე მათთან დარჩება.

მაგრამ მთავარი მაინც ის ემოცია იყო, რაც თამაშის შემდეგ დაგვრჩა: სხვადასხვა დეპარტამენტის წევრები ერთად ვფიქრობდით, ვერთობოდით და აღმოვაჩინეთ, რომ ჩვენს გვერდით არაერთი „ფარული გენიოსი“ მუშაობს.

ვიმედოვნებთ, რომ ინტელექტუალური შეჯიბრის მეორე სეზონი კიდევ უფრო მასშტაბური, საინტერესო და დასამახსოვრებელი იქნება.