Shine Awards: ახალი ტრადიცია აპგეიმინგის ოფისში

გულახდილად ვთქვათ, როცა საქმე ბევრია და ტემპი - სწრაფი, ხშირად გვავიწყდება იმ ადამიანების დაფასება, რომლებიც რთულ პროცესებს გვიმსუბუქებენ. ზუსტად ამიტომ ოფისში ახალი ინიციატივა, Shine Awards დავნერგეთ - უკვე გვაქვს მიზეზი, რომ მცირე ხნით შევჩერდეთ და მადლობა გადავუხადოთ მათ, ვინც აპგეიმინგს უბრალო სამსახურზე მეტად აქცევს.

რა არის Shine Awards?

სამ თვეში ერთხელ, ჩვენს ლაინაფში იმ კოლეგებს გამოვარჩევთ, რომლებმაც ამ პერიოდში რაღაც განსაკუთრებული გააკეთეს. აქ მთავარი მხოლოდ მშრალი შედეგები არ არის, არამედ ის თვისებები, რაც ერთ გუნდად გვკრავს: თანამშრომელი, რომელიც ყველაზე რთულ მომენტში ამოგიდგება მხარში; ადამიანი, რომელიც სრულიად მოულოდნელ და გენიალურ გამოსავალს იპოვის, ან უბრალოდ ის, ვისი პოზიტივიც მთელ დეპარტამენტს მუშაობის ხალისს უბრუნებს.

პირველი დაჯილდოებულები

პირველივე დაჯილდოებაზე ბევრი ნომინანტი გვყავდა და მივხვდით, ერთმანეთის მიმართ ბევრი კარგი სათქმელი დაგვიგროვდა. მადლობებს ყველგან შეხვდებოდით: დაწყებული რთული ტექნიკური ამოცანების ამოხსნით, დამთავრებული იმ ადამიანის დაფასებით, ვინც „კრიტიკულ სიტუაციაში სიმშვიდეს ინარჩუნებს და სხვებსაც ამშვიდებს“.

ყველა ნომინანტს ვულოცავთ - თქვენ მართლა მაგალითი მოგვეცით და ძალიან გაგვიხარდა თქვენი წარმატება!

რატომ ვაკეთებთ ამას?

საბოლოო ჯამში, ნებისმიერ ტექნოლოგიას ის ხალხი ქმნის, ვინც მის უკან დგას. Shine Awards საშუალებას გვაძლევს, რომ არცერთი მონდომებით გაკეთებული საქმე არ დარჩეს შეუმჩნეველი. ეს ინიციატივა კარგი მიზეზია ერთმანეთის დასაფასებლად და იმ გარემოს შესანარჩუნებლად, სადაც მუშაობა გვიხარია.

ასე გააგრძელეთ! უკვე ინტერესით ველოდებით, ვინ გახდება შემდეგი კვარტლის რჩეული.