Upgaming-ის დროის მანქანა: როგორ დავბრუნდით 90-იან წლებში

თუ ფიქრობთ, რომ დროში მოგზაურობა შეუძლებელია, ესე იგი აპგეიმინგის ბოლო ივენთი გამოტოვეთ. ერთ დღესაც ოფისში მოსულ თანამშრომლებს 2026 წლის ნაცვლად, ნამდვილი, ავთენტური და ცოტათი გიჟური 90-იანი წლები დაგვხვდა. „შუქი მოვიდა“, ოღონდ ამჯერად ნოსტალგიის, მუსიკისა და დაუვიწყარი გართობის სახით.

ოფისში ფეხის შედგმისთანავე ყველამ იგრძნო, რომ გარემო რადიკალურად შეიცვალა. თანამედროვე ტექნიკა ჩაანაცვლა ძველმა, მძიმე ტელევიზორებმა და მაგნიტოფონებმა, რომლებიც კასეტების ფანქარს ითხოვდნენ. კედლებზე გაკრულმა იმ ეპოქის საკულტო პოსტერებმა, ანტიკვარულმა ტელეფონებმა და რეტრო ავეჯმა სხვა სამყაროში გადაგვიყვანა. ყველაზე გემრიელი დეტალი კი, რა თქმა უნდა, გაზეთში შეხვეული მზესუმზირა იყო, რომლის გარეშეც 90-იანების უბნის „ბირჟა” წარმოუდგენელი იქნებოდა.

დრესკოდს აპგეიმინგის გუნდმა, ჩვეული ენთუზიაზმით, უმაღლეს დონეზე უპასუხა. ოფისში ნახავდით შავებში ჩაცმულ ბიჭებს და ფერადი სპორტულებითა და ტყავის ქურთუკებით შემოსილ თანამშრომლებს. განსაკუთრებული ყურადღება კი კონკრეტულმა პერსონაჟებმა მიიპყრეს – დერეფნებში ერთდროულად შეხვდებოდით იარაღასხმულ მხედრიონელს, ედუარდ შევარდნაძეს და ეზო-ეზო მოსიარულე ნაყინის გამყიდველს.

რა იქნებოდა 90-იანების ივენთი იმ ეპოქის მთავარი საუნდტრეკების გარეშე? საღამოს კულმინაცია და მთავარი სიურპრიზი ქართული ჰიპ-ჰოპის ლეგენდის, ლექს-სენის გამოჩენა გახდა. მთელი ოფისი ერთხმად მღეროდა იმ სიმღერებს, რომლებზეც თაობები გაიზარდნენ. შოუს მუსიკალურ გაფორმებაზე და წვეულების რიტმზე ასევე საღამოს მეორე სტუმარმა, ძვალმა იზრუნა, რომელმაც სპეციალური DJ სეტი დაუკრა და ნოსტალგიური ბითებით გააცილა საღამო.

ასეთი დღეები აპგეიმინგის ყოველდღიურობის ნაწილია. აქ, საუკეთესო პროდუქტების შექმნასთან ერთად, საერთო მოგონებებსაც ვქმნით. ეს დღეც სწორედ ასეთი იყო - სავსე სიცილით, წარსულის გახსენებით და იმის გააზრებით, თუ რამდენად შორს წავედით მას შემდეგ. მადლობა ყველას, ვინც ამ დღის შექმნაში მიიღო მონაწილეობა. შემდეგ გაჩერებამდე - ვინ იცის, რომელ ეპოქაში ამოვყოთ თავი!